Grazzi!
Hekk kif waslet fi tmiemha l-ewwel sena tagħna fl-attiviżmu, nixtiequ nirringrazzjaw lil dawk kollha li b’xi mod jew ieħor kienu magħna u għenuna naslu sa hawn.
Mir-residenti ta’ bosta rħula li laqgħuna u ħadmu magħna biex nippreżervaw il-ġid komuni, lill-kontributuri tagħna, għal dawk li għenuna nistabbilixxu l-identità tagħna, tawna pariri, silfuna s-sound, ramawlna d-dawl, jew imqar tawna l-kuraġġ biex inkomplu fid-direzzjoni li qbadna.
F’din l-ewwel sena tagħna ħdimna mar-residenti fuq riforma fl-ippjanar, l-ewwel waħda tax-xorta tagħha – miktuba mill-poplu għall-poplu – u hija l-unika kontrapiż għat-tibdil fil-Local Plans li bih il-partiti l-kbar jixtiequ jpaxxu lill-iżviluppaturi.
Ħdimna mal-Kunsilli Lokali ta’ Ħaż Żebbuġ bl-għan li l-Palazz tal-Baruni jerġa’ jinfetaħ għall-pubbliku, u ma’ dak tal-Mellieħa fil-ġlidiet kontra l-iżviluppi skandalużi fil-Mellieha Heights u tas-Salib; għenna sabiex jinħolqu għaqdiet tar-residenti fil-Qrendi, Ħal Safi, il-Mellieħa, u għamilna mod li nagħtu leħen lilhom, minflok nitkellmu għalihom aħna.
Tkellimna u kellna laqgħat mal-awtoritajiet dwar il-kwistjoni tad-drittijiet tal-ħaddiema – Maltin u mhux – li qed jiġu sfruttati bla heda minn negozjanti bla skrupli, u tajna l-appoġġ tagħna lill-istudenti tal-MCAST, maqbuda fin-nofs ta’ tilwima industrijali bejn il-Gvern u l-għalliema tagħhom.
Se nibqgħu mexjin fid-direzzjoni tagħna, dik li naħdmu direttament mal-poplu, u nagħtu vuċi lil min verament ħaqqu jitkellem. Il-ħidma ta’ Il-Kollettiv għadha tibda, u se tkompli, u se tieħu l-ħin li għandha bżonn, sabiex dak li ilna naħdmu fuqu sentejn isir bl-għaqal, bl-onestà, bl-integrità li jistħoqqilhom dawk kollha li jgħixu f’pajjiżna, u li jixtiequ politika aħjar.
Għalina hija kwistjoni ta’ prinċipju, u se nimxu miegħu; ix-xewqa għal politika aħjar m’għandhiex twaqqaf il-ħidma li qed issir mal-poplu.
Nawgurawlkom is-sena t-tajba, u nwegħdukom li se nibqgħu naħdmu, kemm fil-bnazzi u kemm fil-maltemp.
Ritratti
Lisa Attard
Jess Worley
Glenn Muscat
Uffiċċju tal-President tar-Repubblika
Juliana Alexandra
The Times of Malta
