Il-PA tressaq is-smigħ ta’ Ħal Safi

Wara konferenza stampa tar-residenti ta’ Ħal Safi ftit tal-ġranet ilu, l-Awtorità tal-Ippjanar ressqet is-smigħ ta’ PA/03176/22 għall-21 ta’ Ġunju.

Ir-residenti ta’ Ħal Safi jingħaqdu għall-ewwel darba kontra żvilupp li qed jhedded il-kwalità tal-ħajja tagħhom. Ritratt: Residenti ta’ Ħal Safi

Mhijiex l-ewwel darba li l-PA tieħu azzjoni simili, speċjalment fil-każ ta’ applikazzjonijiet sensittivi li jqanqlu ċertu rabja fost ir-residenti. Minħabba l-fatt li s-smigħ kien oriġinarjament skedat għas-6 ta’ Ġunju - jumejn qabel l-elezzjoni - dan id-deferiment jiġi bħala sorpriża mhux mistennija għar-residenti.

In-nota tal-Awtorità tal-Ippjanar dwar id-deferiment. L-Awtorità qatt ma tagħti raġuni dwar għalfejn ikun ingħata deferiment/posponiment tas-seduti tagħha.

Skont ma huwa previst minn dan l-iżvilupp, għandhom jinbnew 22 appartament u stabbiliment kummerċjali f’tarf iż-żona ta’ konservazzjoni urbana f’Ħal Safi. Dan il-bini mistenni jogħla għal ħames sulari f’żona ta’ tnejn, u se jidħlu minimu ta’ 29 familja fejn bħalissa hemm spazju għal waħda.

Minbarra li se jkerrah u jirvina għal dejjem id-dehra ta’ Ħal Safi, din il-binja se ġġib magħha problemi kbar ta’ traffiku u aċċess għat-triq.

L-iżvilupp mhux jiġi rakkomandat mill-case officer, u għad hemm numru ta’ kwistjonijiet relatati mal-applikazzjoni li għadhom iridu jiġu interessati. Anke l-Kunsill Lokali ta’ Ħal Safi oġġezzjona għal dan l-iżvilupp, u s-Sindku Johan Mula ukoll tkellem fit-tul dwar ir-raġunijiet għalfejn dan l-iżvilupp għandu jiġi rrifjutat.

Ħal Safi huwa wieħed minn numru ta’ rħula magħrufa bħala ta’ “wara l-Mina” li qed jiġi assedjat mill-effetti tal-Local Plans diżastrużi li nkitbu minn amministrazzjoni Nazzjonalista fl-2006 iżda li għadhom jiġu difiżi minn Gvern Laburista bl-iskuża li “ma jistgħux jinbidlu” - għalkemm il-Gvern spiss jikkontradixxi ruħu billi jibdel il-Local Plans ta’ Marsaskala u tal-Qala.